Open Skies Treaty aṭangin US a inhnukdawk

US chuan Pathianni khan Open Skies Treaty aṭangin official-in a inhnukdawk ta tih a puang.

Hemi chungchangah hian US national security adviser Robert O'Brien chuan, "Vawiin (Pathianni) hi US-in Open Skies Treaty aṭanga inhnuhdawhna a tum thu a thehluhna thlaruk tlinna chiah a ni," tiin official-in he Treaty hi an chhuahsan fel ta tih a sawi. 

Kumin May thla khan US president Donald Trump kaihhruai US sorkar chuan thla ruk chhungin Open Skies treaty aṭanga inhnuhdawh a tum tih a lo puang tawh a ni. Inhnuhdawh a tum chhan hi  Russia laka a lungawi loh vang a ni. Russia chu treaty dan bawhchhiaah a puh a, technical lama inbiak duh loah a puh bawk. Russia-ah hian unarmed surveillance flight thlawk lut mah se, an rama hmun ṭhenkhata an sipai leh military facility-te chu an thup tlat niin US chuan a puh a ni. US-in a puhna hi Russia chuan a pha thung.

He treaty hnuaiah hian member-te bikah hian an ram huam chinah, unarmed surveillance flight (indona emaw ralthuam emaw phur lo thlawhtheihna) thlawh tir phal a ni a, he flight kaltlang hian member ram te sipai neih zat, military facility leh thildangte hriat theih a ni ṭhin.

Open Skies treaty hi kum 2002 January khan siam a ni a, he treaty-ah hian member ram 35 an awm mek a ni. Open Skies treaty hi kum 1955 khan US president Dwight Eisenhower chuan Russia nena an thawhdun theih nan din a rawt a, Russia-in kum tam a duh loh hnuah kum 1992 khan din chauh niin, ram leh ram inkara inrin tawnna a awm theih nan mumal takin kum 2002 January 1 aṭang khan kalpui ṭan a ni.