France inthlan thawh khatnaah Macron-an hma hruai

France president ni lai Emmanuel Macron leh far-right wing candidate Marine Le Pen chu rinlawk ang ngeiin France President thar tur thlanna thawh khatnaah hmahruaitu an ni mek. Vote thlak thawhkhatnaah Macron hian vote tla aṭangin 28.2% hmuin, Le Pen hian 23.4% a hmu.

President Macron chuan amah ṭantute hmaah lawmthu sawiin, kar hnih lo awm tur chu France leh Europe hmalam tana hun pawimawh tak a nih tur thu a sawi. "Kan ram hma lam tan hun pawimawh tak inherchhuak turah hian,thil engkim a danglam tawh dawn a ni. Hei vang hian France tan theihtawp chhuah zel ka duh a ni," a ti.

Le Pen pawhin amah ṭantute hmaah thu sawiin, Macron vote lotu zawngte chu rally-a lo tel turin a sawm zui nghal. "Ram zalenna kan neih theihna atan theihtawp ka chhuah dawn a, rampawn aṭanga rawn pem lutte kan thunun ang a, mi zawng zawng tan venhimna ṭha zawk pek kir kan tum dawn a ni," tiin far-right wing candidate hian a sawi.

Kum 2017-a president inthlan pawh lo chuh tawh Le Pen hian France mipuite lungrual taka suihkhawm a, ram ropuia hruai let turin hma a la dawn tih a sawi a ni.

Inthlana pathumna ni mek, far-left wing party Unsubmissive France hotu Jean-Luc Melanchon chuan amah zuitute chu Le Pen vote lo turin a lo ngen ve bawk. "France mipui hian an tihtur chin an hria a, thutlukna pawh anmahniin an siam thei a ni. In vote-te hi Le Pen pe suh u," tiin rally a neih chhungin vawi tam tak a auchhuahpui a ni.

Melenchon ang bawkin, vote thlak thawh khatnaa tling zo ta lo candidate-te chuan Macron chu President inthlanna kalzela an thlawp tur thu an sawi.

Macron leh Le Pen-te hian inthlan thawh hnihna hi April 24 hian an hmachhawn leh dawn a ni.