Russia hmachhawn turin Ukraine inbuatsaih

Russia sipaite'n Ukraine ram chhim leh khawchhak lama beihpui an thlak leh hnuah Ukraine sipaite chuan nimin khan Russia do let turin an inbuatsaih tih an sawi.

Ukraine president Volodymyr Zelenskyy chuan ramdang ṭanpuina zawngin ngawrh takin campaign a kalpui chhunzawm zel a, tunkar chho hi hun pawimawh leh boruak rit tak hmachhawn tura inring turin an ram mipuite a chah.

"Russia hian a la hlauhthawng dawn. Hnehna an chan loh an hlau a ni. Thudik chu an pawm mai a ngai dawn a ni," tiin President Zelenskyy chuan a sawi. "Russia sipaite chu kan state chhim lamah operation lian zawk kalpui turin an insawn dawn a. Kan lakah missile leh air bomb tam zawk an hmang dawn a ni. Mahse, an hmalakna do let turin kan inbuatsaih a. Chhanna kan pe ang, " a ti.

Austrian chancellor Karl Nehammer chuan February 24-a Russia-in Ukraine a do hnua a vawi khatna atan nimin khan Russia president Vladimir Putin chu Moscow-ah inbiakna a neihpui. Russia in beihpui a thlak avang hian Ukraine-a cheng mi maktaduai 44 zinga hmun li a ṭhena hmun khatte chuan an chenna hmun an chhuahsan tawh a ni.