Hamas leh Fatah-in inremna zawnga meeting neih tum

Palestinian pawl pahnih, Fatah leh Hamas-te chuan Thawhṭanni khan an ram chhunga hmun inchuh chungchangah inremna kawng zawnga meeting nei turin thutlukna an siam.

Meeting an neih tur thu hi Fatah's Central Committee-a member Ahmad Helles leh Ahmad Helles-a member Husam Badran-te chuan an ram television-a online hmanga interview an neih dunnaah an sawi a ni. "Kum 13 chhung teh meuh Palestine ram chhunga hmun inchuh avanga buaina neih hnuah, inremna zawnga meeting neih tum a ni ta hi ram mipuite tan chuan thu lawmawm a ni. Ram chhunga inṭhenhran tumna awm reng chu Palestinian-te zia dik tak a ni lo a, ram mipuite hmel leh zia dik tak zawk chu inpumkhat chunga politics leh economy lama kan harsatna te kan beih ho theihna tur chu a ni dawn lawm ni," tiin Helles chuan a sawi.

Pawl pahnihten interview an neih dunnaah hian Badran chuan West Bank leh Gaza Strip chungchangah an ṭan dun thiam a pawimawh thu a sawi a, Israel annexation plan dona kawngah pawh an ṭan dun zel a ṭul thu a sawi bawk.  Thawhṭanni khan Palestinian president Mahmoud Abbas (Fatah party) leh Islamic Hamas movement-te chu an pawl innghirnghona chungchanga meeting neih hi an remti a, kar liam ta khan Fatah's Central Committee-a Jibril al-Rajoub leh Hamas politburo-a deputy chief Saleh Arouri te chu online hmangin an lo inbe hmasa tawh bawk a ni. Hamas leh Fatah pawl hi kum 2007 aṭang khan an ram luah ching chungchangah intih thiam lohna an neih chho ṭan a, hemi kum hian Gaza Strip chu Fatah ho hnen aṭangin Hamas ho chuan an chhuhsak a ni.