Border wall chungchangah Trump leh Democratic hruaitute inhnial
Thawhlehni-a White House-a US President Donald Trump leh Democratic Congress hruaitute meeting chu ramri hungna bang siam chungchangah a inhnial nasa hle. President Trump chuan an ram himna tur a nih chuan sorkar khar (shut down) mai pawh a hreh loh thu a sawi.
Meeting-ah hian President bakah Senate Minority Leader Chuck Schumer leh House Minority Leader Nancy Pelosi-te an tel a, tun thla tawp lama sorkar khar a ngaih maitheih avanga hetiang thleng lo tura a ven dan turte an ngaihtuah a ni.
President Trump chuan meeting ṭan veleh US-Mexico ramri hungna tur fund chungchang a sawichhuak nghal a, "Eng kawng pawhin ramri hungna bang hi siam a ni ang. Sorkar khar ngai hial khawp erawh thleng lo se ka ti. Eng thil nge lo thleng dawn chu kan la hmu ang, mahse ramri bang siam hi kan tan chuan thil pawimawh tak a ni", a ti. Hemi hnu hian ramri himna tur a nih chuan sorkar khar chu a hreh loh thu a sawi. America mipuite chuan ram pawn lam aṭanga pawikhawihtute, ruihtheih thil leh thil danga harsatna tam tak neite an rama luh chu an duh lo a ni, tiin a sawi.
Trump hian Mexico nena an ramri hungna bang siamna atan hian Congress hnenah a tlem berah US dollar tluklehdingawn nga ruahman turin a ngen a ni. Mahse hei hi Congress-a Democrats lam chuan an hnawlsak. President chuan fund pekna tur pawmpui tur hian House-ah mamawh zat vote chu awlsam takin a hmu thei tih a sawi a, mahse Senate-ah Democrats lam member 10 in an vote pui a ngai dawn thung.
Mahse Pelosi chuan House-ah border wall chungchangah majority vote a awm dawn lo niin a sawi a, Schumer nen President Trump chu December 21-a federal funding agency eng emaw zat a tawp dawn avanga sorkar khar a ngaih palh tur veng tura hma la zawk turin an ngen. Ramri himna chu an duh vek thil a ni a, mahse Mexico-in a tumsak dawn loh chuan ramri hungna bang siam chu ram mipuite pawhin an duh lo tih a sawi.
Meeting hi midang tlawh pawh loha neih tura tih ni mah se, Trump hian meeting neih ṭan aṭangin Oval Office-ah hian reporter-te ko lutin a awmtir zui a ni. Pelosi chuan kum khat chuang zet hnua meeting an neih theih chhuna reporter-te hmaa an inhnial chu ṭha a tih loh thu a sawi nghal bawk.