France-a inkahna thlengah mi pali thi

France khawchhak lam, Strasbourg-a Thawhlehnia Krismas bazar bula inkahna thlengah mi pali an thi a, midang 11 in hliam an tuar.

Police-te chuan khaw-puia central square pakhat, Place Kleber-ah inkahna hi a thlen thu sawiin, he thil hi firfiakte tih a ni em tih chhuichian mek a ni tih an sawi.

Security official-te chuan silai hmetpuaktu hi man a la ni lo tih sawiin, pawi a khawih hnuah a in an dapnaah bomb siamna hmaruate pawh hmuh a ni tih an sawi. He inkahna thleng vang hian Strasbourg-a European Parliament pawh khar nghal a ni bawk.

President Emmanuel Macron pawhin Strasbourg khawpuia pawikhawihna thleng vang leh thil awmdan enfiah turin Thawhlehni-a presidential palace-a meet-ing neih pawh a tihtawp phah a ni.

Krismas bazar siam hi a tunhma lam pawhin firfiakten an lo bei fo tawh a ni. Kum 2000 khan Kumhlui thlah ni-a Krismas bazar-a bomb tihpuah tum, Algerian leh French-Algerian firfiak 10 chu man an lo ni tawh a ni.