Pakistan-in sakhaw zalenna palzuta puhna hnawl

US sorkarin Pakistan ram chu sakhaw zalenna palzuta puha a blacklist zingah a telh. He puhna hi Pakistan chuan hnawlin, he thutlukna siam a nih dan chu hleih neiha thil an thlir vang leh politics lama nawrna a awm vang niin a sawi.

Pakistan Foreign Office chuan thuchhuah siamin, US State Department-in annual religious freedom report a tihchhuaha sakhaw zalenna palzuta puh zinga Pakistan a telh chu an pawm lo tih a sawi a ni.

Thawhlehni khan US President Donald Trump-a kaihhruai sorkar chuan Pakistan, China, Saudi Arabia leh ramdang pasarih chu an ram chhunga sakhaw zalenna palzutah a puh a ni.

Thuchhuah an siamah, Pakistan chuan an ram chu sakhua leh society hrang hrangte inngeih taka an awmna hmun a nih thu sawiin, rinna leh sakhua dang mah se sakhaw tlem zawk - Kristian, Hindu, Buddhist leh Sikh-te pawh enhran an ni lo tih a sawi.