Ethiopia PM-in Tigray sipaite inpe turin darkar 72 hun pe

Ethiopia prime minister Abiy Ahmed chuan Pathianni khan Tigrayan bial sipaite chu sorkar kuta inpe turin darkar 72 hun pek an ni tih a puang. 

Ethiopia sipaite chuan Tigrayan regional capital, Makelle chu Tigray People’s Liberation Front (TPLF)-te kut aṭanga lak tumin beihpui an thlak dawn a, hemi hmaa boruak ṭha tak hnuaia inpe mai turin PM chuan a ti a ni. Darkar 72 a liam hnuah chuan an tan kawng a awm tawh dawn lo tiin a vau. 

Sipai thupuangtu chuan Mekelle khawpui hi sipaite chuan tank nen an hual dawn tih a sawi a, a ṭul a nih chuan khawpui hi an kap mai dawn a ni, a ti. Hetih lai hian Tigray biala rorel mek, TPLF lam hian inpek mai an tum loh thu an sawi ve thung. 

November 4 aṭang khan sorkar sipai leh hel sipaite hi inbeiin, mi sang telin an thih phah tawh nia sawi a ni. He inbeihna vang hian mi 30,000 chu an ram ṭhenawm, Sudan ramah an tlanchhe tawh bawk. Ram hrang hrangte chuan inbeihna hi titawp a, inremna kawng zawna inbiakna nei turin an nawr a, mahse Abiy chuan sipaite beihpuia thlak chhunzawm tir zel thung. 

Sorkar sipaite hian hel kut aṭang khan khaw eng emaw an la tawh a, tunah hian helhoin an hmunpui ber atana an hman, mi nuai nga chuang chenna, regional capital hi lak tumin an hmachhawp leh mek a ni. 

Abiy chuan Mekele khawpui lak tuma beihpui an thlaknaah, civil mite an tawrh lohna turin ruahmanna siam a ni tih a sawi. TPLF-te tharum thawhna thleng fo chu Tigray mipuite pawhin an kham tawh a ni tiin, Mekelle mipuite chu sorkar sipai lamah lo ṭang tlat turin a chah. 

TPLF hian kum hnih kal taa Abiy-a'n PM dinhmun a chelh aṭang khan a kaihhruai sorkar chaun Tirgray bial chu en hrangin, he bial mi sorkar leh sipaia chanvo pawimawh chelhte chu ban a, an dikna chanvo neihte palzut sak an ni tiin PM Abiy kaihhruai sorkar lakah hian an hel a ni. 

November 3-a Tigray sipaiten Ethiopian National Defence Force (ENDF) headquarters an beih aṭangin sorkar sipaite nen hian an inbei zui a ni.