Sri Lanka PM hluiin dah let phût

Sri Lanka President Maithripala Sirisena-an prime minister aṭanga a ban, Ranil Wickremesinghe chuan prime minister-a dah let a nih loh chuan an ram khawpuia nawrh huaihawtah a vau.

President Sirisena hian October thla khan Wickremesinghe hi PM aṭangin a ban a, a aiawh turin Mahinda Rajapakse a ruat a ni. Mahse Wickremesinghe chuan Parliament-ah majority a la nei reng tih sawiin, PM a nih aṭanga ban a nih dan chu ram danpui kalh a ni a, dan ang takin Sri Lanka PM a la ni reng niin a sawi a ni.

PM atana ruat thar Rajapakse hi Parliament-ah ṭum hnih fiah ni tawhin, fiahna hi a paltlang zo lo ve ve a ni. Mahse hetichung hian a bang duh lo a, President pawhin thlawptu ngah zawk Wickremesinghe hi PM-ah a dah lut duh lo bawk. Mahse Parliament chuan PM Rajapaksa hi sorkar fund a hman a khapsak zui a ni. Speaker Karu Jayasuriya pawhin Rajapaksa hian House-ah majority a nei tih a fiah hma chuan dan ang takin PM atan a pawm dawn lo tih a sawi bawk.

Wickremesinghe chuan President hian PM-a a dah let lo anih chuan Colombo-a amah thlawptu mi sing telte nen nawrh an huaihawt dawn tih a sawi. President Sirisena chu Hitler nen pawh a lo tehkhin hial tawh a ni.