France President-in minimum wage tihsan a tiam

France President Emmanuel Macron chuan hun rei tak yellow vest-ten sorkar laka lungawi lohna lantira nawrh an huaihawt hnuah chhiah lak tihhniam leh minimum wage tihsan a tiam.

Yellow vest hian kar li chuang zet chu fuel tax tihsan te, khawsakna hautak chho lutuk leh sorkar policy dang dang duh lohna lantirna nawrh an huaihawt a, nawrh huaihawtnaah hian tharum thawhnate thlengin thil tam tak an tichhia a ni. Mi eng emaw zatin hliam tuarin, nawrh huaihawt zinga mi tam tak man an ni bawk.

President Macron chuan nawrh huaihawtten tharum thawhna an thlen chu a dem thu a sawi a, hemi rual hian an lungawi lohna tam tak chu thil awm tak a nih thu a sawi bawk. President chuan minimum wage chu kum 2019 aṭangin thla khatah euro 100-ah tihsan a nih dawn thu a sawi. Minimum wage tihsanna hi 7% a ni a, hemi atana sum senso tur chu sorkar lamin a tum dawn a ni. Minsiter Olivier Dussopt chuan minimum wage tihsanna turah hian sorkar chuan euro tluklehdingawn 8-10 vel a sen a ngai dawn niin a sawi.

Macron hian region hrang hranga mayor-te pawh a kawm thu sawiin, an rama pemlutte vanga harsatna awmte chinfel dan kawngte a sawipui dawn tih a sawi a ni.