China-in population policy thar hmang dawn
China chuan an ramah nau piang an pun theihna turin population policy thar a hmang dawn.
He policy hi five-year plan (2021-2025) tur a ni a, Thawhṭanni khan China Daily newspaper chuan China sorkarin an rama nau piang an tam theih nan pawisa fai leh policy ṭha tak hmanga hmalakna neih a tum thu a tarlang. Hemi chungchangah hian China Population Association-a vice-president, Yuan Xin chuan population policy chu ram ṭha leh lei ṭha a awm theih nan te, hnathawktu ṭha an tam theih nante leh ram mipui zinga upa zawk te an tam bik loh nana duan a nih thu a sawi.
China chuan population policy thar a hman turah hian nursery service (nau awmna hmun) tih tam tuma hmalakna turte pawh a tel a, hei bakah hian nupui pasal nei thei chin kum bithliah tihhniam tumna te pawh a awm bawk.
Mihring an pun chak avang leh, hei hian an ram economy thlengin a tuar thei dawn nia ngaiin, retheihna umbo duh vangin China hian kum 1978 aṭang khan fa pakhat chauh neihna dan, one child policy chu a hman ṭan a ni. Mahse kum 2016 aṭang khan one child policy a hman chu thlahdul chhoin fa pahnih neih a phal chho ta a ni. Hetianga hma a lakna chu nau piang an tlem avanga kum upa lam an pun chhoh zel vanga hnathawk thin chin an tlem chak tak vang a ni. Hei vang hian kum naupang lam zawk an pun chhoh leh theihna turin population policy hi hman a tum leh ta a ni.
Peking University-a population studies professor, Lu Jiehua chuan policy thar China sorkarin a hman hma hian sawihona mumal tak leh research neih a pawimawh hmasak thu a sawi a, nupa tuak zawng zawngte chu fa pathum chin neih a phal dawn nge, sorkarin family planning policy a hman mek chu a paih bo rih dawn tih te chu ngun taka ngaihtuah hmasak a pawimawh thu a sawi.
China-ah hian kum 60 chin chunglam chu nikum khan maktaduai 254 an awm a, hei hi a ram mipui zawng zawng aṭanga 18.1% a tling pha a ni. Kum 2025-ah chuan kum 60 chin chunglam te hi mtd 300 leh kum 2035-ah chuan mtd 400 vela an pun chhoh rin a ni bawk.