Gaza-a intihbuaina thlengah Palestinian 32 in hliam tuar

Gaza Strip hmarlama Israel sipai leh Palestinian-te inkara buaina chhuakah Palestinian mi 32 in hliam an tuar.

Palestinian Red Crescent Society-in a tarlan danin, Israel sipaite silai kahah Palestinian mi 11 in hliam an tuar a, mi 12 chu rubber bullet in fuhin, tear gas vangin mi pakua-in hliam an tuar bawk a ni.

Thawhṭanni apiangin Palestinian-te hian Gaza Strip hmarlamah Israel ramri bulah nawrh an huaihawt ṭhin a, kum 12 chhung zet Israel-in Gaza kalpawhna a khuahkhirh sak chu titawp turin an phut a ni. Thawhṭanni bakah, March 30-a Great March of Return rally huaihawt a nih aṭang khan Zirtawpni apiangin nawrh huaihawt leh a ni bawk.

Gaza Health Ministry thupuangtu Ashraf al-Qedra chuan thuchhuah siamin, March 30 aṭanga Gaza ramril bula nawrh huaihawtte leh Israel sipaite inkara buaina chhuakah Palestinian mi 239 kahhlum an ni tawh a, mi 25,000 in hliam an tuar tawh bawk niin a sawi.