Ukraine-a Mariupol-ah civil mi 10,000 chuang thah an ni tawh

Ukraine-Russia indona thleng mek chu nimin kha a ni 48-na a ni tawh a, Mairupol-a chemical weapon hman a nih thu report awm karah Ukraine president Volodymyr Zelenskyy chuan khawthlang ramte chu Russia-in chemical weapon a hmang tur danna atan hrekna na zawk siam turin a ngen.

Russia sipaite bomb-na avangin Ukraine-a khawpui ṭhahnem taka building leh kawngpuite chu an chhe nasa tawh hle. Ukraine chuan Russia chu war crime thlenah puhin, mi pawisawi lo that leh hmeichhiate pawngsualah a puh.

Ukraine lawng chawlhna khawpui, Mariupol khaw mayor chuan civil mi 10,000 chuangte chu Russia beihna vang hian an thi tawh tih a sawi. Thi zat hi 20,000 velah a pun chhoh theih a rin thu leh Mariupol mite ruang chu khawlaia an let rem rum lai hmuh tur a awm tih a sawi bawk.

United States chuan Russia president Vladimir Putin-a'n a sipaite a hnukkir lo a nih chuan Russian oil leh gas hralh chhuah kawngah hrekna an siam tur thu leh, an thawhpui ramte pawh an hnung rawn zui turin thurawn a pe dawn tih a sawi. Putin leh Belarus president Alexander Lukashenko te chu nimin khan inbiain, Ukraine ram dinhmun leh khawthlang ramte hrekna an siam chungchang an sawi dun tih ram pahnih news agency-te chuan an tarlang.

Russia foreign minister Sergey Lavrov chuan an military operation neih lai chu inremna zawnga inbiakna avanga an chawlhsan loh tur thu sawiin, Ukraine nena inbiakna neih chhunzawm zel a ṭulna a hriat loh thu a sawi.