Biden-a'n silai khuahkhirhna dan khauh zawk siam

United States president Joe Biden kaihhruai sorkar chuan Thawhṭanni khan an ramchhunga dan bawhchhiatna hluar chho zel venna atan silai chhui chhuah theih loh, 'ghost gun' serial nei lo, online kaltlanga leia remkhawm mai theih chi khapna dan khauh zawk a tichhuak.

Nikum chhung ringawt khan Bureau of Alcohol, Tobacco, Firearms and Explosives (ATF) hnenah ghost gun nia rinhlelh ṭum 20,000 report a awm a, kum 2016 nena khaikhinin a let sawmin a tam tawh zawk a ni.

Ghost gun-ah hian serial number a chuan loh avangin, U.S. law enforcement-te chuan pawikhawihna a thlen thulhah silai neitu chhuichhuahna kawngah harsatna lian tak an tawh phah fo ṭhin.

U.S. Department of Justice (DOJ)-in thupek thar a chhuahah, online leh dawra serial nei lo silai hmanrua, awlsam taka minute 30 chhung vela an remkhawm mai theih chi hi khap a ni. Heng hmanruate hi Gun Control Act hnuaiah awmin a siamtute chuan licence leh serial number an pek vek a ngai a, silai hralh chhuaktute pawh hi federal licence kawl leh hralhchhuah phalna nei an ni tur tih a ni.

President Biden chuan an rama silai hmanga pawikhawihna thleng ṭhin tihtlemna tura hmalakna kawng khat atan khuahkhirhna dan thar hi White House-a Rose Garden-ah puang a, a puan lai hian vice president Kamala Harris leh deputy attorney general Lisa Monaco-te pawh an awm.

"Heng silaite hi mi tam takin pawikhawihna hmanrua atan an hmang a ni. Heng ralthuam tibo tur hian kan theih angin hma kanla zel dawn a, kan hmuhte chu rei tak jail-ah khung an ni ang," tiin President chuan a sawi.

Hetih lai hian Biden kaihhruai sorkarin dan thar a siam hian Republican leh gun rights advocate-te chu a ti thinur hle a. Kentucky republican US Congressman Thomas Massie chuan silai rintlak tak siam aiin serial number nawhreh hi a awlsam daih zawk a ni, a ti. US-a hmunpui nei National Rifle Association chuan he khapna hian pawikhawihna a tihrem phah an rin loh thu an lo sawi ve bawk.

Tunhnai chhoah US-ah hian silai hmanga pawikhawihna hi a hluar chho hle. Kumin chhung hian US-ah silai hmansual avanga thihpui emaw hliam tuar emaw mi 21,000 chuang an awm tawh a, tawng pawng inkahna vawi 130 aia tlem lo a thleng hman tih nonprofit research group Gun Violence Archive chuan a tarlang.