Imran Khan-an inthlan ṭhat phût, mipuite duhthlan tir turin ngen

Pakistan prime minister aṭanga paihthlak tak, Imran Khan chuan Thawhṭannia PM thar atana Shehbaz Sharif lakluh a nih hnu lawkah an rama inthlan ṭhat neih a phut thu a sawi.

Tehreek-e-Insaf (PTI) chairman Imran Khan chuan, "Mipuite chu dik leh zalen takin an prime minister tur atana an duh chu thlan tir an ni tur a ni," tiin an ram chu ramdangin an duh duh dana tihkual theih an nih loh thu a sawi. Khan PM aṭanga paihthlak a nih avanga lungawi lohna lantirin Peshawar-ah rally buatsaih an tum thu leh, he hunah hian a lam ṭangte chu kal vek turin a sawm zui nghal a ni.

Imran Khan kaihhhruai PTI sorkar hian Inrinni liamta khan National Assembly-ah no-confidence motion an paltlang zawh loh avangin paithlak a ni a, hemi hnu hian Shehbaz Sharif chu PM thar atan thlan niin, Thawhṭanni tlai khan National Assembly-ah rinawmna thu tiamtira lakluh a ni.