Covid-19 inkaihhruaina bawhchhiat vangin UK PM pawisa chawitir dawn

Britain prime minister Boris Johnson leh Exchequer chancellor Rishi Sunak-te chu Covid hri leng vanga an ramin inkharkhip an kalpui laia party-naa an kal avangin police-ten pawisa an chawi tir dawn.

Sorkar thupuangtu chuan PM Johnson leh Sunak-te hian Metropolitan Police (Met) aṭangin pawisa chawi tura hriattirna hi an dawng tawh tih a sawi. Met chuan Johnson office leh Downing Street-a a chenna ina lockdown rules bawhchhiata kalkhawm mi 30 chuangte pawh pawisa chawitir vek an ni dawn tih a lo sawi tawh a, March thla tawp lam khan mi 20 te chu pawisa chawitir an lo ni tawh a ni.

Kum 2020 leh 2021-a Downing Street-a party an neih lai hi an ramin coronavirus khuahkhirhna a kalpui lai, sorkar lam pawhin pungkhawm lo tura mipuite ngenna an siam reng lai a nih avangin he thil hian mipui pawh a ti lungawi lo hle. Johnson chetdan avang hian a dinhmun pawh a derthawn phah hle a, opposition party leh Conservative party lama a member puite ngei pawhin bang turin an phut hial.

Met hian January thla tawp khan Britain-in Covid-19 inkharkhip hmasa ber an hman laia punkhawmna ṭum 12 awm chungchang a chhui a, heng zingah PM Johnson telna May 20, 2020-a boozy garden party hi a tel a ni. Mahse Johnson erawh chuan hna lam thil emaw a tih avanga kal a nih thu a sawi thung. June 19, 2020 vek khan a thawhpuite chuan Johnson-a birthday hi an lawmsak bawk a ni.

Sorkarin a hrana heng thil thleng chhuitu a ruata an hotu, Sue Gray chuan January 31 khan report tichhuakin, "No. 10 (Downing Street) leh Cabinet Office-ah hun hrang hrangah inkaihhruaina fel hle leh ṭha tawk lo a awm a ni," tiin a tarlang.

Thawhlehnia Met thuchhuah puanzar a nih leh tak hnu hian Johnson bang tura nawrna pawh a awm thar leh a, eptu pawl Labour Party hotu Keir Starmer chuan,"Boris Johnson leh Rishi Sunak-te hian dan an bawhchhia a, British mipui hmaah vawi duai lo dawt an sawi a, an pahnihin an bang ve ve tur a ni," a ti.