New York subway-a pawikhawihtu ngawrh takin zawng mek

New York subway car-a Thawhlehni zinga smoke bomb pahnih tipuak a, silai hmetpuak zuitu chu police-te chuan ngawrh takin an zawng mek. He pawikhawihna thleng vang hian mi 20 chuangin hliam an tuar a ni.

Police-te chuan pawikhawihtu hian thurualpui a nei lo nia a lan thu leh, pawikhawihna hmun hi a tlanchhiat san zui nghal thu an sawi. Silai hian mi 10 a kap hliam a, heng zinga mi pangate chu an na hle a, damdawi-in lamah enkawl an ni tih thuneitute chuan an sawi. Mi dang 13 chu meikhu an hip luh nasat avang leh, subway car aṭanga tlanchhuah tuma an innekbuainaah hliam an tuar bawk.

Subway-a pawikhawihna thlentu hi mita hmutute sawidanin, palian lam, gray sweatshirt chunga orange vest ha, helmet hring khum leh surgical mask vuah a ni tih police-te chuan an sawi. Commissioner chuan he inbeihna hi train car-in station a luh dawna thleng niin an sawi a, pawikhawihtu hian a bag pai aṭangin canister pahnih phawrhin rel chhungah hian meikhu nasa tak a tichhuak a ni.

Police-te chuan a silai ken, Glock 9 mm semi-automatic handgun aṭangin mu 33 a hmetpuak hman tih sawiin, a silai hman bakah extended ammunition magazine pathum, hatchet, consumer-grade firework leh gasoline container chu police-te hian a hnuah an hmu chhuak a ni.

New York mayor Eric Adams chuan United States-a silai hmanga pawikhawihna thlen ṭhin chungchang sawichhuakin, "America ram chhungah hetiang thil hi a thleng zing tawh mah mah a ni. Ram pum huapa kan ṭanruala kan beihlet ve a ngai dawn a ni," a ti.