Jerusalem-ah Israel police leh Palestine mite intibuai

Israeli police leh Palestine mite chu Jerusalem Old City-a al-Aqsa mosque bulah nimin zing khan an intibuai.

Kar hnih liamta chhung khan ram chhungah Arab mite'n pawikhawihna liantham tak tak an thlen fo avangin Israel sipaite pawh khawpui chhungah inralring taka awmin, venhimna khauh zawkin an kalpui a ni.

Israel police-te hi nimin zing khan al-Aqsa mosque-a ṭawngṭaina hun hman zawha pungkhawm zuite chu hnawhdarh tumin an kal a, mahse he hmuna awmte hian police-te hi lungin an lo tawng a, police-te hian tear gas leh stun grenade-te an hmang zui ve nghal bawk a ni.

Muslim-te thla pawimawh Ramadan , Jewish mite'n Egypt saltanna aṭanga an talchhuah hun,'passover' an lawmna leh Kristian-te hun pawimawh Easter festival-te chu kuminah hian a innan chhoh avangin Jerusalem khawpui pawh boruak ṭang tak hnuaiah a awm a, sakhaw hrang hrang betute inkara buaina a chhuah lohna turin thuneitu lam pawhin hma an la a ni.

Police-te chuan Muslim hmun thianghlim pathumna, Al-Aqsa mosque chhungah an luh mai loh thu sawiin, mahse ṭawngṭai hun a zawh hnua Palestinian mi la awmkhawmten Western Wall lama Juda mite ṭawngṭaina hmun chu lung hmanga an tawng vangin mipui hnawhdarh tumincompound chhungah an lut chauh tih an sawi.

Palestinian Red Crescent ambulance service chuan tear gas leh rubber bullet vangin mi 59 ten hliam an tuar tih an sawi. Gaza huamchhunga thuneitu Islamist pawl Hamas chuan thil thlen chhanah Israel police-te chu puhin, buaina thleng chu an mawhphurhnaa la ngam turin a ti.