Finland leh Sweden-in NATO an zawm chuan Russia-in nuclear ralthuam hmanah vau

Russia-Ukraine inbeihna boruak sang tak kal zelah Finland leh Sweden-in North Atlantic Treaty Organization (NATO) an zawm chuan Baltic Sea region chhehvelah nuclear weapon hmanah Russia Security Council deputy chief, Dmitry Medvedev chuan a vau.

Russia president hlui Medvedev chuan, "Baltic tan nuclear hmang lo tura inbiakna kan nei thei lo ang," tiin he bialah hian Iskander missile, hypersonic weapon leh nuclear ralthuam phur lawngte chu Russia in a dah maitheih thu a sawi bawk.

Medvedev hi Russia-in hmarthlang lama a ṭhenawm, NATO zawm tuma ramte vauna siam hmasa ber pawl a ni. Mahse, Finland leh Sweden chuan Ukraine chunga Russia chet dan an thlirin, NATO zawm chungchang hi an ngaihtuah mek tih an sawi.

Hetihlai hian Lithuania defense minister Arvydas Anusauskas chuan Ningani khan Russia hian Baltic Sea-a Kaliningrad hrulah nuclear ralthuam a dah tawh nia a lan thu a sawi thung.

Russia leh Finland ramri hi km 1,300 a thui a ni a, hei hi NATO member dangte nena an inrina belhkhawm ai pawhin a thui zawk a ni. Finland leh Sweden hian NATO hi an zawm a nih chuan, khawmual lamah an sipaite leh anti-aircraft bakah Gulf of Finland lama an lawng sipaite an thuam chak chhoh a ngai dawn tih Medvedev chuan a sawi a ni.