Khawvel pumah Covid-19 kai mtd 500 chuang awm tawh

Khawvel pumah Covid-19 hri kai chhinchhiah chu mi maktaduai 500 chuang an awm tawh tih World Health Organization (WHO) data thar ber tihchhuah chuan a tarlang.

Ningani thleng khan Covid-19 kai hmuhchhuah hi 50,01,86,525 an awm tawh a, heng zinga 61,90,349-te chuan an thihpui thu WHO Coronavirus (COVID-19) Dashboard chuan a tarlang a ni.

United States-ah hri kai mi mtd 79.71 leh thihpui 9,79,321 awm tawhin, hri kai leh thihpui tamna ber ram a la ni chhunzawm zel a, khawvela hri kai tawh aṭanga 16% dawn chu US-a mi an ni. US dawtah hian India awmin, hri kai mtd 43 leh thihpui 5,21,743 an awm tawh a, Brazil-ah hri kai mtd 30 leh thihpui 6,61,493 an awm tawh bawk.

WHO regional office aṭanga a lan danin, Europe leh America-ah hri kai hmuhchhuah hi mtd 209 leh mtd 151 bakah thihpui 1,964,786 leh 2,711,779 ve ve an awm tawh. Region pahnihah hian khawvel huapa hri kai zinga 72% chuang leh khawvel puma thihpui zinga 75% chuang an awm a ni.

WHO statistics-in a tarlan danin, kartina Covid-19 kai thar leh thihpui zat hi an tlahniam chhunzawm zel. WHO chuan hripui leng chu ram zawng zawng tana public health emergency a la nih reng thu leh, Covid-19 khuahkhirhnate kengkawh thei tura inring reng turin Nilaini khan ram hrang hrangte a ngen nawn leh.