North leh South Korea sipaite DMZ kaltlangin inkalpawh

North Korea leh South Korea sipaite chu Nilaini khan an inri-na, Demilitarised Zone (DMZ) kaltlangin an inkalpawh a, hei hi Korea ram pahnih ṭhendarh a nih hnua a thlen vawikhatna a ni.

Sipaite hi ramri-ah hlim taka in chibaiin an ram hi an inkalpawh tawn a ni.

Kum 1950 chhoa Korean War avang khan Korea ram hi pahniha ṭhen a ni a, indo hi tawp mah se inremna mumal tak siam a awm lo.

Korea ram pahnihte hian an inkar boruak siamṭhat tumin hma an la mek a, kumin April thlaa SKorea President Moon Jae-in leh North Korea hotu Kim Jong-un ten meeting an neihah venhimna khauh tak hnuaia awm, DMZ-a guard post ṭhenkhat tihtawp te an remti a ni. DMZ hi khawvela ram ri ven nasat ber zinga mi a ni a, km 250 zet thui leh km 4-a zau a ni. Mahse ram pahnih hruaituten inremna an siam hnuah hian border post 10 chu tihchhiat a ni tawh a ni.

Nilaini khan SKorea inspector-te chuan DMZ patlangin North lama guard post-te chu an endik a, NKorea inspector-ten South lama guard post-te an endik ve bawk. South Korean defence ministry chuan Korea ram ṭhenhran anih hnua sipaiten boruak ṭha tak hnuaia ramri an kaltlang ṭum khatna a nih thu a sawi.

November thla khan South Korea aṭangin rel chu ramri kaltlangin NKorea ramah tlan luh tir a lo ni tawh bawk a, South lam hian North railway network tihchangtlunna turin a pui dawn a ni.