Donald Trump-a lawyer hlui kum thum tang turin hrem

US President Donald Trump-a lawyer hlui, Michael Cohen chu kum 2016 election campaign laia dan kalha hmeichhe pahnihte ka hupna atana sum a pek vang leh, Congress hnenah Russia-a Trump Tower project siam tum chungchanga dawt a sawi avangin kum thum tang tura hrem a ni.

US District Judge William Pauley chuan Cohen chu campaign finance law palzuta pawisa a sem avangin thla 36 tang turin a hrem a, hei bakah hian Congress hmaa dawt a sawi avangin thla hnih tang turin a hrem bawk. Judge chuan Cohen hi nakkum March 6-ah thuneitute kuta inpe turin a hriattir nghal bawk.

New York-a federal prosecutor-te chuan kum 52 mi, Cohen hian kum 2016 November thlaa US president thlanna neih anih hma khan, hetihlaia president candidate Donald Trump-a nena lo inkawp tawh ṭhin nia sawi adult film actress Stormy Daniels chu a ka hup nan dollar 130,000 a pe a, playboy model Karen McDougal hnenah dollar 150,000 pekna turah pawh a pui bawk niin an sawi. Trump chuan heng hmeichhe pahnih ten inkawp tawh ni anga an insawi chu a pha thung.

Prosecutor-te chuan heng hmeichhiate hnena sum pek a nih dan hi campaign finance laws kalh a ni tih an sawi a, Cohen chuan sum pek chungchang hi Trump-a thupek anga ti a nih thu a sawi a ni.