Venezuela President-in thah tuma phiarruah US puh

Venezuela President Nicolas Maduro chuan US chuan thah tumin a phiarru a, a kaihhruai sorkar paihthlak a tum a ni, a ti.

President Maduro chuan amah leh a kaihhruai sorkar tihchhiat tuma phiarutu zingah hian US National Security Adviser John Bolton pawh a tel niin a sawi a, mahse a thusawi finfiahna tur erawh engmah a tilang lo thung.

US President Donald Trump chuan Venezuela president hi dictator nia sawiin, an ram hrekna tur pawh hi a lo siawm tawh a ni. Tunkar tir lama Venezuela-a Russian bomber tirh a ni pawh kha US chuan a sawisel bawk. Russian Tupolev Tu-160 bomber-te hi nuclear ralthuam phur thei an ni.

Maduro chuan Miraflores presidential palace-a reporter-te a kawmnaah, thah a nih theih dan tur buaipu turin John Bolton chu ruat a ni a, Venezuela rama ramdang sipaite tirlutin sorkar thlak thleng tir a awm a ni, ti. Hemi rual hian Venezuala mipuite chu an ram tihchhiat tumte theihtawpa beilet turin an inpeih reng a, an ṭhianṭha ram dangte pawhin an pui dawn a ni, tiin a sawi. Maduro hian a hma pawhin US leh Colombia bakah an rama eptu pawlte chuan thah tumin an phiarru niin a lo puh tawh bawk.

Thawhṭanni khan Russia bomber pahnihte chu Venezuela khawpui, Carascas khaw daia Simon Bolivar airport-ah an ṭum a, an rual hian Russia thlawhtheihna pahnih a ṭum tel bawk. US Secretary of State Mike Pompeo chuan Venezuela-a Russian bomber tirh a ni hi a sawisel nghal a ni. Mahse Venezuela Defence Minister Vladimir Padrino chuan Russia leh Venezuela-ten air force exercise an neihna tur ami a nih thu a sawi thung.

Kum 2014 aṭang khan Venezuela tualchhung dinhmun hi a chhe chho hle a, sum lamah harsatna nasa tak tawk chhoin, thil man a san chak bakah ei tur duhkhawp lei tur pawh a awm lo fo a ni. Ram economy buaina vang hian an ram mipui maktaduai hnih chuang zet chu ramdangah an tlanchhe tawh bawk.