Russia-in Mariupol-a Ukraine sipaite inpe turin a ti

Russia defence ministry chuan Ukraine sipai, Mariupol venhim tuma chhim lama inkhuarte chu Pathianni zing dar 6 aṭangin an sahimna turin an ralthuamte daha inpe turin a ti.

Russia sipaite chuan Mariupol-a urban area chu an luah fel tawh tih an sawi a, mahse hei hi finfiah theih erawh a ni rih lo. An thusawi hi a dik a nih chuan, February 24-a Russia sipaiten Ukraine an run hnuah, Mariupol hi Ukraine khawpui lian zingah Russia sipaite kuta tlu hmasa ber tur a ni ang.

Mariupol-a sipai la awm mek, Ukraine leh ram dang mite chu Azovstal steelwork plant-ah danchah an ni tawh niin Russia chuan a sawi. Russia defence ministry chuan hemi chungchanga thuchhuah a siamah, "Azovstal metallurgical plant-a boruak sang tak inmung mek thlir chung leh mipui hmakhaw ngaitak chungin, Russian Armed Forces-te chuan tualchhung leh rampawn sipaite chu April 17 zing dar 6 hmaa an ralthuamte dahṭha turin hun kan pe a ni," a ti. An ralthuam daha inpete chu an nunna zuahsak an nih tur thu a sawi nghal bawk.

Russia-in ruahmanna a siamah hian, an ram huna nimin zing dar 6 aṭang khanUkraine sipaite hi inpek hun hawnin, inpete chu Azovstal plant aṭangin ralthuam eng mah keng loin chhuah zalen an ni thung ang. Inpe duhte chu an flag vaia hriattir turin a ti a ni.

Ukraine chuan Russia thuchhuah hi a la chhang lo a, Ukraine president Volodymyr Zelenskyy chuan Inrinni khan Russia chu Mariupol khawpuia chengte nuai chimit vek tumah a puh a, he khawpui venhim tuma ṭan la khawh mek sipaite chu a kaihhruai sorkar chuan a bepawp reng tih a sawi.

Azov Sea kama awm, Mariupol khawpui hi hmun pawimawh tak niin, Russia hian Ukraine a run tirh aṭangin a bitum nghal a ni. Russia-in a lak tawh, Crimea bial leh khawchhak lama Donestk bial inkara awm a ni a, he khawpui hi a thununna hnuaia a awm chuan Russia sipaite tan chetvel a awlsam phah dawn a, Azov tuipui hmarlam pum pui chu a thunun thei dawn a ni.

Russia defence ministry chuan Mariupol aṭangin mi 1,68,000 an sawnchhuak tawh tih a sawi a, hetih lai hian Ukraine chuan Russia lam hian tihluihna hmangin mi sang tel a hruaichhuak niin a sawi ve thung.

Mariupol aṭanga civil mi lakchhuah hna thawh hi International Committee of the Red Cross ṭanpuina hnuaiah an thawk ṭhin a, mahse ram pahnihte inhmuhthiam lohna avangin chawlhsan a ni a, mawhphurtuah an inpuh tawn a ni.