Myanmar sipai sorkarin mi tang 1,600 chhuah dawn

Myanmar sipai sorkar chuan an ram kumthar, Buddist New Year lawmna pualin mi tang 1,600-te chu ngaidamin a chhuah zalen dawn tih a puang.

Nikum khan kumthar lawmna pualin sipai sorkar hian tang 23,000 te a lo chhuah tawh bawk a ni.

Kumina tang a chhuah tur zingah hian kum 2021, February-a civil sorkar a paihthlak taka member-te kha an tel dawn em tih erawh sawichian a la ni lo. Sipaite hian civil sorkar an paihthlak hnuah hian mi 13,282 dawn an man tawh bakah mi 1,756 an that tawh tih Assistance Association of Political Prisoners (AAPP) activist group chuan a tarlang. Man zingah hian civil sorkar an paihthlak taka an hotu, Aung San Suu Kyi bakah a economic adviser, Australia mi Sean Turnell pawh a tel a, Turnell hi Isein tan-inah a tang mek.

Sipaiten tang chhuah tur thu an puan hnuah, tang chhungte tam tak chu nimin khan Yangon khaw daia Insein tan-in kawtah an kalkhawm nghal a ni.

Sipai sorkara state secretary, lieutenant general Aung Lin Dw chuan tang chhuah tur chungchangah hian thuchhuah siamin, 'Myanmar kumthar lawmna pualin mi 1,619 chhuah an ni dawn a,an zingah hian ram dang mi 42 an tel ang," a ti.