Myanmar-ah hri kai tam ber ni thleng

Myanmar ramah nimin khan hri kai hmuh chhuah mi 23 an awm a, an rama hri kai hmuh chhuah tam ber ni a ni. 

Hri kai hmuh chhuahte hi Thailand leh Malaysia aṭanga hawte an ni. Myanmar-a Covid-19 kai hmuh chhuah hi mi 286 an ni tawh a, an zinga parukin an thihpui tawh a ni. Health ministry chuan hri kai tharte chu Kayin state mite an nih thu sawiin, Yangon Region-a Waibagi Specialist Hospital-ah sawn nghal an ni tih a sawi. 

Hripui leng vangin ram danga awmte an haw khawm mek a, January thla aṭang khan mi 1,60,000 chuang an haw tawh a ni. Ram danga aṭanga haw zingah hri kai hi hmuh an ni leh ṭhin avangin, international flight khapna hlih tak leh, border gate hawn chungchang pawh ngaihtuah ṭhat leh a ni mai thei niin ministry lam chuan a sawi bawk. 

Hri kai hmuh chhuah hma leh a darh zel tur venna atana pawimawh chu test neih tam a ni a, hetihlai hian Myanmar ramah hian test-na tur, Covid-19 laboratory hi pali chauh a la awm. Yangon-ah pathum leh Mandalay-ah pakhat a awm a, ni khatah mi 1,000 chin chauh an test thei a ni. Mon leh Shan state-ah laboratory hawn tuma buatsaih mek a ni. 

Health ministry data-a a lan danin, January 31- June 19 chhungin sample 56,725 test a ni tawh. Yangon chu hri kai tamna ber niin Covid-19 kai hi mi 201 an awm a, Kayin state-ah mi 25 an awm bawk.

Brazil ramah Covid-19 kai an la pung chak hle a, ni thum chhung a zawnin kai thar hi mi 1,000 chuang zel an awm tawh a ni. Brazil ramah Covid-19 kai zat hi mi maktaduai khat an tling teuh hlawh hle. 

Nimin thleng khan Brazil ramah hri kai hmuh chhuah tawh hi mi 9,83,359 an awm tawh a, he hri vanga thi hi mi 47,869 an tling tawh bawk. 

Sao Paulo chu state zinga hri kai tamna ber niin mi 1,92,628 in a kai a, an zinga 11,846 in an thihpui tawh a ni. Rio de Janeiro state-ah hri kai hi 87,317 awmin, mi 8,412  in an thihpui tawh bawk a ni.

Khawvel ram hrang hrangah nimin thleng khan Covid-19 kai 85,99,287 an awm tawh. Hri kai zinga mi 45,49,677 chu enkawl dam an ni tawh a, mi 4,56,727 in an thihpui tawh thung. 

US chu hri kai tamna leh hri vanga thi tamna ber ram a ni chhunzawm zel. US-a hri kai hmuh chhuah hi mi 22,63,756 an tling tawh a, mi 1,20,688 in an thihpui tawh a ni. US dawtah hian Brazil, Russia, India, UK, Spain, Peru, Italy, Chile leh Iran-te chu hri kai tam zualna ram an ni.