Sri Lanka SC-in Parliament ṭhiah dan kalhah a puang

Sri Lanka Supreme Court chuan Ningani khan President Maithripala Sirisena-an an ram Parliament term tawp hmaa a ṭhiah chu ram danpui kalh nia sawiin, a hnawlsak.

President Sirisena hian October 25 khan Sri Lanka Prime Minister aṭanga Ranil Wickremesinghe banin a aiah eptu pawl hruaitu Mahinda Rajapaksa a dah a, hemi hnu November 9 khan parliament ṭhiatin nakkum January 5-a inthlan ṭhat neih turin a puang zui leh nghal a ni.

President thupek hi Wickremesinghe thlawptu lam chuan Supreme Court-ah an thlen zui a, hun enge emaw chen court thutlukna nghah a nih hnuah Ningani khan court chuan ngaihtuahin, thutlukna hi a puang ta a ni. Judge pasarih awmna bench chuan lungrual takin, President Sirisena hian member 225 awmna House hi a ṭhiat ngawt thei lo tiin an rel thlu a ni. Hei vang hian Parliament inthlan pawh a neih hun tur pangai, kum 2020-ah neih a ni dawn ta chauh a ni.

Supreme Court-in Parliament ṭhiahna a hnawl tak avangin Wickremesinghe pawh PM-ah dah let theihna kawng a inhawng dawn nia ngaih a ni. Parliament-ah hian Wickremesinghe hian PM thar atana dah Rajapaksa aiin thlawptu a la ngah zawk. Rajapaka hian ṭum hnih fiahna a paltlang zo lo tawh a, mahse hetichung hian PM a nihna aṭangin a bang duh lo a, President Sirisena pawhin Wickremesinghe hi Parliament member ten thlawp vek mah se PM atana dah let a tum loh thu a sawi tawh bawk.

Hetihlai hian Wickremesinghe chuan Supreme Court thutlukna siam chu lawmawm a tih thu sawiin, President Sirisena pawhin court thupek chu a zah ngei a beisei thu a sawi.

Sri Lanka politics buaina hian an ram economy thlengin a nghawng tawh a, an ram pawisa hlutna pawh a tlahniam chak a, November thlaah khan an ram pawisa cheng 177.20 leh dollar khat hlutzawng a inang tawh a, pawisa hlutna a tlakhniam ber ṭum a ni. Hei bakah hian politics buaina an neih aṭangin foreign investor eng emaw zat an inhnuhdawk tawh a, investment an tihtawp hlut zawng hi dollar matkaduai 169.5 chuang zet a tling a ni.