DR Congo-ah voting machine dahna kang

President thar thlang tura inbuatsaih mek, DR Congo-ah an ram khawpui, Kinshada-a vote thlakna tur, electronic voting machine dahna hmun chu Ningani khan a kang. Kinshasa tana hmang turin voting machine hmun thuma ṭhena hmun hnih aia tam leh ballot box ṭhahnem tak a kangchhia.

Kangmei chhuah chhan hi hriat a la ni lo a, chhuichian mek a ni.

December 23 hian Congo president Joseph Kabila thlaktu tur thlan a ni dawn a ni. Kum 17 zet thuneihna lo chelh tawh, President Kabila term hi kum 2016 khan a tawp tawh a, mahse inthlan neih tur hi tihkhawtlai zel a ni. Eptu party-te chuan president hi bang tura phutin nawrh an huaihawt fo a, nawrh huaihawtnaa tharum thawhna thlengah mi tam takin nunna an chan tawh a ni.

President thar thlan turah hian rorellai chuan candidate atan Interior Minister hlui Emmanuel Ramazani Shadary an dah a, eptu lamin joint candidate atan sumdawng lian Martin Layulu an dah bawk.

Kumin inthlanah hian election commission a ṭum khatna atan vote thlakna turin electronic voting machine hman a tum a, mahse heihi eptu lam chuan sawiselin vote tihchingpenna remchanga hman an hlauh thu an sawi.

Electoral commission official chuan kangmei chhuakah hian EVM 8,000 vel zet a kangchhia niin a sawi a, mahse hei hian inthlan neih tur a tibahlah dawn lo a, ruahman lawk angin inthlan hi kalpui a ni dawn tih a sawi. Ramchhung hmun dang aṭagin voting machine hman tur hi lak a ni dawn tih a sawi a ni.

President adviser Barnabe Kikaya Bin Karubi chuan misualte thiltih a nih thu sawiin, an ram democracy rahbeh tumte thiltih a ni, a ti. Voting machine dahna warehouse vengtute pawh man an nih thu a sawi bawk.