North Korea-in A rukin naval base a siam

North Korea chuan an ram hmarchhak lam, Sinpo-ah a rukin sipai lawng chawlh hmun, underground naval base a siam tih researcher, Jacob Bogle chuan a sawi.

Bogle chuan he thil hi satellite thlalak hmanga finfiahna a neih thu sawiin, he hmun hi North Korea sipaiten an indo lawng an siamṭhatna tur leh, paiwmawh danga an hman theih tur niin a sawi. Indo a thlen palh thulha pawh bihrukna tur hmun ṭha tak a nih thu a sawi bawk. 

North Korea hotupa Kim Jong-un chuan tunlai changkanna hmanga a ram sipai thuam ṭhat a tum chho mek zel a, hemi kawngah pawh sum a seng nasa hle a ni. Kim hmalakna kal zelah he naval base pawh hi siam a ni tih Bogle chuan sawiin, Kim chenna in aṭangin pawhin a hla lo tih a sawi. 

Hemi rual hian satellite thlalaka a lan danin, naval base siam hi ṭhat tawk lohna a awm nia sawi a ni. Kim hian a sipaite leh defence hmunhma te thuam chakna turin sum tak tak seng mah se, a bikin underground facility ho an siam dan chu a fuh tawk lo a ni, tiin Bogle chuan a sawi. Leihnuaia defence hmun an siamte hi a luhna a fuh lo vek a, hmelmaten a luhna hi an tihchhiat chuan hman tlak lohin an awm thei vek tih a sawi.