Sri Lanka PM Rajapaksa a bang ; PM atan Wickremesinghe dah let nghal a ni

Mahinda Rajapaksa chu kar kalta Inrinni khan Sri Lanka prime minister a nihna aṭangin a bang a, Pathianni khan PM hlui Ranil Wickremesinghe chu PM-ah hian dah let nghal niin, rinawnma thu tiamtira lakluh a ni.

October 26-a Sri Lanka President Maithripala Sirisena-an PM aṭanga Wickremesinghe ban a, a aia president hlui Rajapaksa a dah aṭang khan politics lama buaina hi a inṭan a ni. Wickremesinghe hian Parliament-ah thlawptu a la ngah ber a, hei vang hian President-in a ban chu ram danpui kalh niin a sawi. President-in PM atana a ruat, Rajapaska hian Parliament-ah ṭum hnih fiahna a paltlang zo lo a, mahse hetichung hian PM aṭang hian a bang duh chuang lo a ni. Wickremesinghe leh Rajapaksa-te hian PM niin an inchhal ve ve a ni.

Sri Lanka Supreme Court chuan President Sirisen-an Parliament ṭhiat a, nakkum January thlaa inthlanpui nei tura a puan pawh a hnawlsak bawk. Rajapaksa kaihruai sorkar pawh eng hna mah thawk thei lo turin a dang bawk a ni. Kar kalta Nilaini khan Parliament chuan Wickremesinghe chu prime minister atana an rin tawk thu an pass bawk.

Thla hnih dawn thuneihna inchuh vanga an buai hnuah, Inrinni khan Rajapaksa hian President hnenah banna lehkha a thehlut ta a ni. Rajapaksa chuan inthlanpui buatsaih a nih mai dawn loh avangin prime minister nih zel chu a tum ta lo tih a sawi. President kawng daltu nih a tum lo tih sawiin, sorkar thar a din theihna tura kawng hawnsak turin a bang ta tih a sawi a ni.

President Sirisena hi Rajapaksa party thawhpui ṭhin niin, a hmaa Rajapaksa kaihhruai sorkarah pawh a lo tel tawh a ni. Mahse kum 2015 khan Ranil Wickremesingh thawhpuiin Rajapaksa an hneh a, ṭangrual sorkar an siam zui a ni. Sirisena leh Wickremesinghe te inkar boruak hi a chhe chho a, October khan president hian Wickremesinghe hi banin, aiah Rajapaksa hi a dah ta a ni. Mahse ban a nih hnuah Wickremesinghe hi a inhnuhdawh duh loh avang leh, amah thlaktu Rajapaksa chuan Parliament-ah fiahna a paltlang theih loh avangin thla hnih dawn Sri Lanka sorkar chu hnathawk mumal thei loin a awm hman a ni.

Sirisena chuan Wickremesinghe hian Parliament-ah majority nei mah se PM atan a dah leh dawn lo tih a lo sawi tawh a, mahse Inrinni-a Rajapaksa-an banna a thehluh leh tak avangin Pathianni khan PM hlui hi rinawmna thu tiam tirin a lalut nawn leh ta a ni. Nimina Wickremesinghe lakluhnaah hian President chuan journalist-te an tel a remti lo.