France-ah yellow vest-ten nawrh huaihawt leh

France sorkar laka lungawi lohna lantira kartin kartawpa nawrh huaihawttu, Yellow Vest-te chuan kar kalta Inrinni khan khawpui hrang hrangah a ṭum nga-na atan nawrh an huaihawt leh.

Yellow vest-te hian fuel tax sang duh lohna lantirin nawrh hi an huaihawt ṭan a, sorkarin fuel chhiah tihsanna hi hman loh remti mah se, sorkar lakah lungawi lohna hi an lantir chhunzawm ta zel a ni. Mahse kar kalta Inrinni-a nawrh huaihawtah hian pungkhawm pawh an tlem sawt tawh hle a ni.

Nawrh huaihawtte hian khawpui hrang hrangah buaina chawk chhuakin motor-te an hal bakah, sorkar thil tam tak an tichhe bawk.

Inrinni-a nawrh huai-hawtah hian buaina a chhuah venthawn thilah police 69,000 chuang duty tir an ni a, buaina liantham chhuak a awm lo.