NKorea-in US hrekna siam dem

North Korea chuan US-in an ram official-te hrekna thar a siam chu a dem thu sawiin, hei hian Korean peninsula-a nuclear ralthuam tihbona tur kawng a dang thei niin a sawi.

US hian NKorea ram top official pathum chu an rama mihring dikna chanvo palzuta puh an nih hnuah hrekna a siam a ni.

Kumin June thlaa Singapore-a US President Donald Trump leh NKorea hotu Kim Jong-un ten summit an neih khan Korean Peninsula aṭanga ralthuam tihbo a nih theihna turin inremna an siam a ni. Mahse hemi atan hian hun bituk siam a ni lo a, hei bakah hian enfiah a nih dan tur kimchang pawh siam a la ni lo. Hruaitu pahnihte hian summit ṭum hnihna an neih leh theih dan tur pawh ngaihtuah mek a ni. President Trump chuan Kim nena inhmuh leh rawt chungchangah a inhawn reng thu a sawi a, mahse a hmanhmawh lo tih a sawi.

NKorea sorkar chuan thuchhuah siamin, US-in official-te hrekna a tichhuak thar leh chuan a ṭhawng hle tih a sawi. US state department chu ram pahnihte inkara boruak siamṭha tura an hmalakna te dah pawimawh lo a, a hmalama an inkar boruak chhiat lai dinhmunah hruai kir leh tumah an puh a ni.

US in hrekna a siam tharte hi Kim Jong-un-a right-hand man Choe Ryong-hae bakah security minister Jong Kyong-thaek leh propaganda official Pak Kwang-ho te an ni. State department thupuangtu Robert Palladino chuan NKorea ramah chuan mihring dikna chanvo palzutna a la nasa hle tih a sawi a, sorkar phalnaa inthahna te, tihluihna hmanga hna thawh tir te, innghaisak, thubuai siamsak si loa hun rei tak hren beh, pawngsual, nau tihtlak luih tir leh mipat hmeichhiat lam hawia pawikhawihnate a thleng nasa a ni, a ti.