Georgia president thar atan Salome Zurabishvili lalut

Georgia ram president panga-na leh hmeichhe president hmasa ber, Salome Zurabishvili chu Pathianni khan rinawmna thu tiamtira lakluh a ni.

Telavi khuaah President thar hi lakluh a ni a, lakluh a nih hnua thu a sawiah Zurabishvili chuan Georgia mipuite dikna leh zalenna vawnhim sak zel a tiam a, dik taka ro an rel tur thu a sawi. A tum ber chu an ram hmasawnna tura thawh a ni tih a sawi bawk. Boruak ṭha tak hnuaia thuneihna inhlanchhawn a ni chu lawmawm a tih thu sawiin, hei hi hmasawnna kawng khat a ni, a ti.

President thar lakluh inkhawmah hian mi 1,800 vel an tel a, an zingah hian ram dang leh international organization aiawh 150 an tel bawk .

Kum 66 mi, Zurabishvili hi France rama piang a ni a, kum 2004-2005 khan Georgia foreign minister a lo ni tawh a ni.

October 28-a Georgia president panga-na tur thlannaah khan political party candidate 19 leh independent candidate paruk an awm a, inthlan thawh khatnaa president tling tura vote hmuh ngai zat hmu tling an awm lo. Vote hmu sang candidate pahnihten inthlan thawh hnihna hmachhawn lehin, Zurabishvili hi thlan tlin a ni ta a ni.