Russia President-in 'rap music' khuahkhirh duh

Russia President Vladimir Putin chuan an rama 'rap music' khap tum chu thil theih loh a nih avangin, sorkar chuan a khuahkhirhna kawngah hma nasa zawka a lak a ngai a ni, a ti.

Ramchhung hmun hrang hranga concert neih tur eng emaw zat cancel a nih hnuah, President Putin chuan 'rap music' bikah chuan sorkar chu charge la turin a ti a, Ministry of Culture chuan concert kalpui dan ṭha ber a la ngaihtuah dawn a ni, a ti.

Tun thla tir khan Russia chhim-a Krasnodar khaw thuneitute chuan Russian rapper Husky concert neih tur chu uchuak tak taka a chet ṭhin avangin an cancel sak a, hemi hnu hian a concert neih tur dangte cancel zui a ni. Husky hi car chungah a zai avangin ni 12 chhung jail-ah khung a ni bawk a ni.

Presidential Council for Culture and Art meeting, St Petersburg-ah neihah President Putin chuan rap music chungchanga harsatna awm mekte chu fimkhur taka an ngaihtuah a ngaih thu a sawi. "Khap theih a nih loh chuan sorkar kuta dah a, kawng ṭha zawnga her rem a ngai a ni", a ti. Ṭhalai zinga damdawi hmangsual an awm zel chu ngaihven a ngaih thu a sawi bawk.

President chuan, "Rap leh modert art dangte hi thil pathum - sex, drugs leh nawrh (protest)-ah an innghat a ni. Drugs chungchang hi ka ngaimawh ber a, hei hi ram tlukchhiatna tur kawng a ni", a ti. Rap music pawh khuakhirhna ṭha tak hnuaia kalpui a ngai tih sawiin, rap-a ṭawngkam mawi lo leh bawlhhlawh tak tak hman ṭhin chu ngaihtuah zui a ngai a, ṭawng lama mithiamte pawh a sawipui tih a sawi bawk.