Mariupol venghimtute'n a tawp thlengin an bei dawn : Ukraine PM

Ukraine prime minister Denys Shmyhal chuan lawng chawlhna hmunpui Mariupol khawpui venhim hna thawk mekte chuan Russia sipaite do let turin a tawp thlengin an bei dawn tih a sawi.

Russia lamin khawpui chhuahsan tura Ukraine mite an vau hnuah pawh he khawpui hi an la chhuhsak thei lo tih PM chuan a sawi bawk.

Hetih lai hian president Volodymyr Zelenskyy chuan khawchhak lama Donbas region chu Russia kuta hlan tumna an neih loh thu a sawi. Tunhnaiah Russia sipaite hian Ukraine khawchhak lam bial hi an bei chho leh ṭan a, Kharkhiv khua an beihnaah civil mi panga an thi a, Zolote khuaah mi pahnih an thi bawk niin Ukraine official-te chuan an sawi.

Chhim lamah Mykolaiv khawpui vengtute chuan Russia sipaiten Odesa lawngchawlh hmun an pan tur pawh an la dang zel a, governor chuan rocket hmanga inbeih chhunzawm a la nih reng thu a sawi a ni.

Russia-in Mariupol-a Ukraine sipaiten inpe tura Pathianni thlenga hun a pek chu Ukraine lam hian an zawm lo a, PM Shmyhal chuan, "Khawpui hi a la tluchhe lo a, kan military force, kan sipaite an la awm avangin a tawp thlengin kan bei dawn a ni. Tunah hian Mariupol-ah an la awm vek a ni," a ti.

Hetih lai hian Russia sipaite chuan Mariupol khawpui pum deuhthaw chu an kutah a awm tawh tih an sawi a, mahse Ukraine-a Azov Battalion-te chuan Azovstal-a steelwork bulah an la inkhuar mek tih an sawi thung.

Ukraine chuan Mariupol-a civil mite hmun him lama an kalchhuahna tur leh, Ukraine sipai hliam chhuah phalsak a, kawng hawng leh turin Russia sipaite hi an phut. Hun rei tak chhung chu inthiarchhuahna runpui hi neih a ni tawh lo. Khawpuia civil mi la tangkhang mekte dinhmun chu a ṭha tawh lo hle nia sawi a ni.