Ukraine-in EU member ni tura zawhna siamte chhang zo

Ukraine chuan European Union member an nih theihna tura zawhna buatsaih, questionnaire chu an chhang zo tawh tih President Volodymyr Zelenskyy office-a deputy head Ihor Zhovkva chuan a sawi.

European Commission president Ursula von der Leyen chuan April 8-a Kyiv a tlawh ṭum khan Zelenskyy hnenah questionnaire hi a pe a, Russia nena an indona boruak kal zelah Ukraine-in EU member an nih vat theihnan a puih tur thu a sawi lang.

"Ukraine lam chuan vawiin khan document-a thil ṭulte chu kan ti fel thei a ni," tiin Zhovka chuan Ukrainian public broadcaster-te hmaah Pathianni khan a sawi. European Commission chuan member ni thei tura tehna an paltlang hnuah pawmpuina an tihchhuah leh a ngai dawn a ni, tiin "Thu lawmawm tak hriat kan beisei," a ti.

Zhovkva chuan June thlaa neih tur European Council meeting-ah Ukraine chu EU member ni tura hlan kai hman an beisei tih a sawi. Kumin June 23-24 hian European Council-te chu an inhmukhawm dawn tih Council chuan an website kaltlangin an tarlang.