Democrats lamin ramri hungna tur sum pek remti lo
US President Donald Trump-an Mexico leh US ramri hungna bang siam a tumna atana sum pek chu Democrats lamain an la remtihpui thei lo.
Democrats lamin thuneihna an chan tharna, House chuan ramri hungna bang siamna atan President Trump-an dollar tluklehdingawn 5 a dil a, an sum mamawh zat hi an hmuh theih dawn loh chuan sorkar khar (shutdown) mai pawh a pawitih loh tur thu kar hmasa khan a lo sawi tawh a ni.
Congress-in federal agency hrang hrangte sum pek tur hi a remtih theih loh chuan tunkar tawp lamah sorkar khar pawh hi a ngai dawn nia sawi a ni.
US mipuite ngaihdan lak hnuhnung berah 57% chuan President Trump chu border wall chungchang a buaipui hi tawpsan a, sorkar chu hnathawk chhunzawm thei tura dah tura an duh thu an sawi. Mahse Trump hi a inhnuhdawk duh lo a, an mamawh an hmuhna tur a nih chuan a ṭul dan azirin sorkar khar pawh chu a inpeih tih a sawi.
White House senior adviser Stephen Miller chuan President Trump hi sorkar khar turin a inpeih hle tih sawiin, Democrats lam chuan thlan tur pahih an nei a, America rama working class te emaw, dan loa an rama pemlutte emaw chu an thlan a ngai a, a pahnih hian an thlang thei lo tih a sawi a ni. Stephen Miller hi Trump-a immigrant policy duangtu bera sawi a ni.
President Trump hian ramri hungna bang siamna tur hian a tirah chuan dollar tluklehdingawn 25 a dil a, mahse a hnuah dollar tld 5-ah a tihniam a ni. Mahse Democrats lam hian tuna an sum dinhmun enin, he project atan hian dollar tld 1.6 bak an remtihpui thei lo niin an sawi. Hei pawh hi bang siamna atan ni loin, ramri hungna awmsate cheiṭhat leh tihchangtlunna tura hman tur chauhin an ti bawk.
Democratic Senate leader Chuck Schumer chuan Trump chu eng kawng mahin ramri hungna tur sum pek an tum loh thu a sawi. Trump-an a nawr nasat vang ngawtin Republican te ngei pawhin thil dik lo a ni tih an hriat chu an remtihpui thei lo tih a sawi.
Congress-in federal agency-te sum pek tur hi a remtihpui theih loh chuan, heng agency hrang hrangte hi December 21 hian sum hman tur nei loin an awm tawh dawn a ni. Hei vang hian Zirtawpni zanlai aṭangin sorkar hnuaia agency tam tak chu hna thawk thei loin khar an ngai dawn a, heng zingah hian Homeland Security, Transportaton, Agriculture, State, leh Justice deparment te an tel dawn a ni.