Iraq-in Great Mosque din tharna tur lungphum phum

Iraq chuan Mosul khawpuia Islamic State (IS) ten an tihchhiat, Great Mosque of al-Nuri din tharna tur lungphum a phum.

Sunni Muslim Endow-ment hotu Abdul Latif al-Humayin chuan Pathianni khan lungphum hi a phum a, he hunah hian UN leh EU aiawhte pawh an tel a ni.

Great Mosque of al-Nuri hi Mosul khaw hmingthanna pakhat a ni. Kum 2014 khan IS hoin Iraq sipaite kut aṭanga Mosul khua hi an la a, nikuma Iraq sipaiten firfiakte kut aṭanga khawpui lak let tuma an beih ṭum khan IS ho hian mosque hi an bomb chhia a ni. Mosul khaw laklet tuma beitu, Iraq sipaite leh IS firfiakte hi thla kua chhung zet an inbei a, hemi chhung hian khawpui chhung hmun tam tak tihchhiat a ni a, civil mi sang tel thah an nih bakah mi 900,000 chuang zet an tlanchhe bawk.

Mosque dintharna atan hian United Arab Emirates chuan dollar maktaduai 50 a thawh tawh a, he hna hi kum nga chhunga zawh hman tum a ni. A kum khatnaah chuan a awmna hmun thenfai hna hi thawh phawt a ni ang a, kum li chhungin minaret, prayer hall leh a bula buildingte chu sak ṭhat an ni ang. Mosul khuaa huan hmngthang tak leh memorial leh museum-te pawh din thar leh tum a ni bawk a ni.