Belgium PM-in banna thehlut

Belgium Prime Minister Charles Michel chuan a kaihhruai ṭangrual sorkara tel party pakhat a inhnuhdawh avangin Thawhlehni khan PM a nihna aṭanga banna a thehlut.

Charles Michel hian nikuma UN migration deal siam chu a thlawp a, hei hi ṭangrual sorkara tel New Flemish Alliance (N0VA) chuan duh loin, sorkar an thlawpna pawh an hnuhdawk a ni. UN deal siam duh lohna lantir hian Brussels-ah lungawi lohna pawh lantir a lo ni tawh bawk.

Michels chuan Belgium lal King Philippe hmuin, PM aṭanga ban a tum thu hi a hrilh a, King Philippe hian a pawmsak dawn leh dawn loh a la puang lo.

Kum 42 mi, Michel hi kum 2014 October thla khan right-wing ṭangrual sorkara Belgium PM atan lakluh a ni a, PM atana lakluh anih lai hian kum 38 mi niin kum 1841 hnu lamah Belgium PM ni thei naupang ber a ni.

Belgium inthlanpui hi nakkum May-ah neih a ni dawn a, mahse a term tawp hmain Michel chuan ban a tum thu hi a sawi a, hei vang hian ruahman lawk aia hmaa inthlan buatsaih pawh a ngai maithei nia sawi a ni.

Nikum July thla khan UN member-te chuan migration deal, Global Compact for Safe, Orderly and Regular Migration siam an remti a, he inremna hi member 196 zingah ram 164 in an sign a, mahse US leh Europe ram ṭhenkhat chuan an he inremna hi an ziak ve duh lo. Inremna ziak duh lo ram zingah hian Austria, Hungary, Italy, Poland leh Slovakia-te pawh an tel.