Catalan Speaker-in European court-ah ngenna thlen

Catalan parliament speaker, jail-a tang mek Carme Forcadell-i chuan chhuah a nih theihna turin European Court of Human Rights (ECHR)-ah ngenna a thlen.

Kum 63 mi, Forcadell-i hi kum 2017-a Catalan independence nawrna kawnga a hmalakna avangin Spain court chuan thubuai a siamsak a, kumin March thla khan man a ni. Catalan parliament speaker hna hi nakkum January thleng chelh tur a ni a, mahse thla kua dawn chu jail-ah hun a hmang tawh a ni. Jail-a a pindanah hian midang tlawhpawh lohin nikhatah darkar 15 dah a ni ṭhin a, a thubuaiah hian thiam loh chantir a nih chuan kum 17 thleng tantir theih a ni bawk ang.

A tanna, Mas d'Enric-a an kawmnaah, Forcadell-i chuan a tanna pindan, meter 10 biala khawsak chu a hrehawm hle tih sawiin, nitin pawisawi lo a ni tih inhre chunga khungbeh nih te, eng chen nge khungbeh zel anih dawn tih pawh hre loa awm ngawt chu a hahthlak hle tih sawiin, a chhungte pawh a ngai tawh hle niin a ni. A nu kum 90 mi tan pawh a hrehawm zual tih a sawi a, a pasal leh a fapte tan pawh chhuah thuai a duh thu a sawi.

Nikum October 27-a Catalan Parliament-in Spain aṭanga Catalan independence an puan ṭum khan Forcadell-i hi speaker a ni a, hemi kum November thlaah man niin bail-a chhuah a ni leh a, mahse kumin March thla khan man lehin jail-ah dah a ni. A thubuai hi kumtharah ngaihtuah a ni ang.

Forcadell chuan tih dik loh engmah a neih loh thu sawiin, speaker a ni a, independence chungchang debate neih chu a khap ngawt thei lo tih sawiin, parliament-a a tam zawk duh dan ang chu kalpui mai tur anih thu a sawi. Nikuma Catalan independence puan chungchangah hian Catalan hruaitu pariat te pawh jail-ah an la mek a ni.