US Defence Secretary Jim Mattis-an banna thehlut

US Defence Secretary Jim Mattis chuan Ningani khan President Donald Trump hnenah banna a thehlut a, nakkum February thla tawp aṭangin a chawl ang.

General Mattis hian banna a thehluhah hian a chawlh chhan tur chiang takin sawilang lo mah se, President Trump-a policy ṭhenkhat a pawmpui theih loh vanga bang ni anga ngaih theih turin a ziak a ni. An thawhpui ramdangte nen inzahtawn taka thawhho ṭha a tih thu te a sawi a, hei bakah hian President chuan a thlir dan leh duhdan ang zawmpui theitu Secretary of Defence neih a ṭha tih sawiin, a tan chuan ban mai chu a ṭha nia a hriat thu a sawilang a ni.

President Trump chuan Mattis-a thlaktu tur hi a la sawilang lo a, mahse tihfel thuai a nih tur thu a sawi.

Mattis-an banna a thehluh hma ni hian President Trump chuan Syria aṭanga US sipaite lakchhuah vek an nih tur thu a lo sawi tawh a, Syria-ah chuan Islamic State (IS) firfiakte lakah hnehna an chang tawh a, an sipaite awm zui zel a ngailo niin a sawi. Hetihlai hian General Mattis hian a hma pawhin Syria aṭanga sipai lakchhuah mai chu a thlawp lo tih a lo sawi tawh a, lakchhuah an nih chuan nghawng ṭha lo tak a awm zui theih thu a sawi. Hei bakah hian Russia leh NATO chungchangah pawh Mattis hian President Trump ngaihdan hi a thlawp lo bawk.

Trump-an Syria aṭanga US sipaite lakchhuah a tum hi an ram chhung bakah ramdang an thawhpui eng emaw zat pawhin a la hun lo nia an ngaih thu sawiin an sawisel a ni. Syria aṭanga sipai a lakchhuah dawn bakah, US hian Aghanistan-a sipai a dah zat pawh tihtlem a tum nia sawi a ni bawk a ni. Wall Street Journal chuan Afghanistan aṭang hian US sipai 7,000 chuang lakchhuah an ni dawn niin a tarlang.