US House-in spending bill a pass

US House of Representative chuan nakkum February thla thlenga US sorkar khar ngai loa a awm theih nan Ningani khan spending bill an pass. Bill pass zingah hian President Donald Trump-an Mexico ramri hungna bang a siamna tur pawh a tel a ni.

House-in spending bill an pass hi Senate-ah ngaihtuah a ni ve leh dawn a, mahse Senate-ah Democrats lamin lo dangin bill hi a tlang zawh rin a ni lo thung. Hei vang hian sorkar agency eng emaw zatin sum hman tur an neih dawn loh avangin sorkar khar pawh a ngaih tho rin a ni thung.

President Trump-an US-Mexico ramri hungna bang siamna tura a fund dil chu Democrats lamin an pawmpui lo a, hei vang hian President chuan ramri hungna bang siamna tur sum telh a nih loh chuan short-term funding bill chu a sign duh lo a ni.

Ningani zan khan House chuan spending bill hi ngaihtuahin vote an la a, member 217 in thlawpin a thlawp lo lamah vote 185 a tla. Spending bill pass-ah hian Trump-an ramri hungna siamna tura dollar maktaduai 5 a dil pawh telh a ni bawk.

Trump-an kum 2016 President thlan dawna a lo tiam tawh, Mexico ramri hungna bang siam a tiam hi Congress lamin fund a mamawh zat an pawmpui theih loh avangin kalpui theih a la ni lo a, hetihlai hian Trump-a thlawptute chuan kawng dangin bang siamna tur sum hi an lo tuak ve bawk. Trump-a thlawptute hian GoFundMe tih hmangin online-ah sum hi an tuak mek a, dollar tluklehdingawn khat tuak chhuah an tum. Ni thum chhungin dollar maktaduai 9 chuang an hmu hman a ni. He campaign neihnaa tel, Iraq war veteran Brian Kolfage chuan thil awlsam tak a ni dawn lo a, mahse America khua leh tui an nihna anga an tih tur a ni tih sawiin, President Trump-an America ram himna siam a tumna kawngah an theihtawpa an puih tur thu a sawi a ni.