Kum 2018 chhungin journalist 53 thah an ni

Committee to Protect Journalists-in annual report a tihchhuahah, kumin chhungin khawvel ram hrang hrangah journalist 53 thah an ni tih a sawi.

New York-based organization chuan December 14 thleng khan an thuziah kaihhnawihah journalist 34 thah an ni a, heng mite nena kumin chhunga journalist thah zat chu 53 an tling tih a tarlang. Kum 2017 khan journalist 47 thah an ni a, heng zinga 18 chu an thil ziah kaihhnawih thil vanga thah an ni. Journalist ṭhenkhat chu indona hmuna silai mu tawnfuh palh vanga thite an ni bawk.

Kumin chhungin Afghanistan ramah journalist thi an tam ber a, mi 13 thah an ni. Heng mite hi Islamic State (IS) firfiakte bomb tihpuaha thi an ni.

Time magazine chuan kar kalta khan 'person of the year' atan journalist thah leh jail-a tang mekte a thlang a, an zingah hian Turkey-a thah Saudi journalist Jamal Khashoggi, Philippines rama tang mek Maria Ressa, Myanmar rama tang Wa Lone leh Kyaw Soe Oo-te an tel.