Russia-in Ukraine khawchhak lam lak tumin beihpui thlak ṭan

Russia sipaite chuan rinlawk ang ngeiin Ukraine khawchhak lamah beihpui an thlak ṭan a, Ukraine official-te chuan indo thawh hnihna inṭanna tiin an sawi.

Ukraine president Volodymyr Zelenskyy chuan Russia hian an ram khawchhak lam, Donbas bialah "Battle of Donbas" a ṭan a, he indonaah hian Russia sipai ṭhahnem tak an tel a ni, a ti. Hemi rual hian," Russia chuan a sipaite chu eng anga tam pawh lo thawn se, kan bei let zel dawn. Kan sahimna turin kan bei zel dawn a ni," tiin President Zelenskyy chuan a sawi.

Zelenskyy-a chief of staff Andriy Yermak pawhin indo thawh hnihnaah hian Ukraine sipaite chuan Russia beihna chu an danchah theih ngei tur thu a sawi a, "Kan sipaite hi ring tawk rawh u, an chak tawk e," a ti.

Donbas biala indona ṭan a nih chungchangah Russia defence ministry lam chuan engmah an la sawi lo. Russia-a Belgorod province governor chuan Ukraine sipaite hian ramria thingtlang khuate an rawn bei nia sawiin, mi pakhatin hliam a tuar thu a sawi.

Ukraine media-te chuan Donetsk bialah pawh inbei thawm, thil puak ring tak tak hriat tur a awm thu sawiin, Marinka, Slavyansk leh Kramatorsk khuate chu beih an nih thu an tarlang. Hmarchhak lama Kharkiv khawpuiah pawh bomb puak rite hriat a ni a, chhim lama Mykolaiv leh chhimchhak lama Zaporizhzhia khuaahte siren tihri thawm hriat tur a awm bawk.

Ukraine top security official, Oleksiy Danilov chuan Russia sipaite chuan Donetsk, Luhansk leh Kharkiv bialah Ukraine lo indannate chu paltlang vek tumin ṭan an la mek tih a sawi.

Donbas hi Russia-in beihpui an thlak hnua an bitum ber zinga mi a la ni chhunzawm zel a, kum 2014 aṭang tawh khan he bialah hian Ukraine aṭanga inlakhran duhtu pawl pahnih a lo din tawh a ni. He bial hi coal leh steel tamna hmun niin, Ukraine pawhin sum a hmuhna hmun pawimawh tak a ni.