Israel-in Gaza rocket a kahthlak sak

Israel sipaite chuan Thawhṭanni khan Gaza Strip aṭanga rocket kahchhuah chu an kahthlak sak tih an sawi. Hei hi Jerusalem-a Palestinian leh Israel police-te inkar buaina a chhuah hnua Gaza aṭanga rocket kahchhuah hmasa ber a ni.

Mahse Gaza-a Palestinian pawl zingah rocket kapchhuaktu nia inchhal hi an la awm lo. Rocket kahchhuah a nih hnu lawk hain Hamas Islamist-te chuan Jerusalem-a Al Aqsa mosque bula Israel mite chetdan chungchangah phuba lak tuma vauna tihchhuah nghal a ni bawk.

Gaza Strip aṭanga Israel ram lama rocket kahchhuah a nih hnu lawkah, Israel sipaite chuan indo thlawhtheihna hmangin an chhang let nghal a, Hamas leh Gaza-a pawl dang camp-te chu an kahchhiat sak. An kahchhiat zingah hian ralthuam siamna hmun pawh a tel niin Israel sipaite chuan an sawi a, thi leh hliam erawh an awm lo tih an sawi bawk a ni.

Kar liamta Zirtawpnia Jerusalem-a Al Aqsa mosque bula Palestinian mite leh Israel riot police-te inkara buaina chhuak avangin Palestinian leh Israel inkar boruak a ṭha lo chho leh hle. He buaina chhuakah hian Palestinian mi 152 leh Israel police pariatin hliam an tuar a ni.

Palestinian-te chuan Muslim thla thianghlim,Ramadan laia Al Aqsa lut lui a, tihbawhrbansak tumah Israel an puh a, hetihlai hian Israel lam chuan Palestinian lungawi lo mi ṭhenkhatin Muslim-te ṭawngtai hun hman chu tihbuai an tum a, Passover lawmna hmang mek Juda-te pawh an lo dang niin an sawi thung.

Jerusalem-a buaina chhuak hian Israel leh Jordan ram inkar boruak pawh a tichhe tel a, Jordan chuan an rama Israel acting ambassador chu koin, an lawm loh thu pawh an hrilh a ni. Jordan lak, King Abdullah chuan UN secretary-general Antonio Guterres hnenah Al Aqsa-a thil thleng chuan Palestinian nena remna leh muanna siam tur pawh a tibahhlah thei a ni, a ti. Jordan prime minister Bisher al-Khasawneh chuan an ram Parliament-ah, Al Aqsa mosque tihbawrhan tum Zionist-te lunga lo tawngtute chu a fak thu a sawi.

Israel prime minister Naftali Bennett chuan buaina chhuaka Israel demna leh pawikhawihna thlen chhanah Israel puhna awm chu an ngai thutak hle tih sawiin, Israel police-te lunga tawng tura Palestinian mite lo fuihtu hi an awm a ni, tiin Jordan PM thusawi tihchhuah a nih hnuah a sawi ve leh.