Ram kang vangin Australia khawpuiah emergency puang

Australia thuneitute chuan nimin khan ram kang vangin an ram khawpui Canberra leh a chheh velah emergency an puang.

Emergency puan hun chhung hi dar kar 72 atana tih a ni a, thli  nasa taka a thawt avangin kawng te chu khar rih  a ni a, mimal tinte chu an in leh lote  uluk taka ngaihven turin ngen an ni bawk. 

Chief Minister for the Australian Capital Territory (ACT), Andrew Barr chuan kum 2003 khan Australia khawpuiah hian a vawikhat nan ram kang vangin emergency puan a nih tawh thu sawiin, kha ram kangah khan mi 4 an thih thu leh chenna in 500 dawn a chhiat thu a sawi bawk.

Ram kang hian ziaawm lam a pan hlei thei lo a, an khawpui chhim lama sq km 185 vela ram ṭhenkhatte chu a kangkai ṭan niin thuneitute chuan an sawi. Nipui lai a nih avanga khawlumin ram kang hi a ti zual zel a, ṭhelh a har thu leh khawi chen nge a kankai zel dawn tih chu hriat thiam a har thu thuneitute chuan an sawi. Ram kang vang hian an ṭhenawm ram New Zealand chuan ram kang meikhu a tuar mek bawk a ni. 

Australia ram kang hi nikum Sep­tember thla aṭanga inṭan nia hriat a ni a, ram hectare maktaduai 11.7 a zau a kan chhiat tawh thu leh thi zat hi mi 33 an awm tawh thu tarlan a ni. Chenna in 2,500 vel a chhe tawh a, hriat theih chinah nungcha tluklehdingawn 1 vel thi leh hliam an awm thu tarlan a ni bawk.