Brazil jail-ah buaina a chhuak, mi 56 thi

Brazil rama Amazonas state khawpui, Manaus jail-ah buaina nasa tak a chhuak a, mi 56 an thi. Thi zinga ṭhenkhatte ruang chu chansawm an nih bakah, ṭhenkhat chu hal an ni.

Official-te chuan Ma­naus-a Anisio Jobim Pe­ni­tentiary Complex-ah Pa­thian­ni tlai aṭang khan buaina a chhuak ṭan niin an sawi a, darkar 17 chhung zet an buai a ni. Buaina siamtute hian jail vengtu mi 12-te an hreng a, tang zingah hian mi eng zat nge tlanchhuak pawh hriatchian a la ni lo.

Amazonas public security hotu, Sergio Fontes chuan jail chhunga buaina chhuak chu ruihhloa tawlhrukin an rama nghawng a neih thui tawhzia a lantir tih sawiin, he buaina chhuak hi an state tan-in chhunga buaina chhuak tawha la rapthlak ber niin a sawi.

Fontes chuan sor­kar laipui hnenah ruihhlo tawlhruk hluar zel doletna kawng­a pui tura an ngen thu leh, tan-in venhimnate tihkhauhsak tur an ngen thu a sawi.

Manaus tan-ina buaina siamtute hi misual pawl pa­hnih, Sao Paulo-a hmunpui nei, First Capital Commande (PCC) leh Amazonas state-a misual pawl Family of the North (FDN) intite an ni. Heng pawl hnihte hi tan-in chhunga thuneitu zawk nih inchuhin hun rei tak an lo intibuai tawh a, ruihhlo tawlhruknaah an intibuai fo bawk.

Brazil ramah hian jail tang mi 600,000 chuang an awm mek a, khawvela jail tang tam lamah pali-na a ni a, US, China leh Russia dawt a ni. Brazil rama jail-te hi a tawt hle a, awm thei tur china bituk aia tam dah an nih ṭhin avang leh, jail tangten kut an tuar fo avang­in human right group lam pawhin an sawisel fo a ni.

Buaina chhuahna hmun, Anisio Jobim jail pawh hi mi 590 tan theihna tura tih ni mah se, mi 2,230 an tang mek. Buaina chhuah vanga jail tang tlanchhuak zinga mi 40 chu man an ni leh tawh a, mi dang eng emaw zat an la bibo a ni.