Israel Police-ten PM Netanyahu thu an zawtfiah

Israel Police-te chuan an ram Prime Minister Benjamin Netanyahu chu eirua puhna kaihhnawihah nimin khan thu an zawtfiah.

Justice ministry official chuan PM hi sumdawng hnena aṭanga hamṭhatna dawnga puh a nih chungchangah thu zawhfiah a ni tih a sawi a, chanchin kimchang erawh a sawilang duh lo. Thu zawhfiah a nih hma, Thawh-ṭanni khan Netanyahu chuan an puhna lakah a fihlim thu leh, tihsual engmah a neih loh thu a lo sawi tawh a ni. Hei vang hian a dinhmunah engmah danglamna a thlen phah dawn lo tih a sawi.

Netanyahu hi Jerusalem-a a chenna inah police-te hian darkar thum chhung thu an zawtfiah a ni.

Jerusalem Post chuan prime minister hi an ramchhunga leh rampawn lama sumdawngte hnen aṭang thilpek man tam tham tak tak dawngah puh a ni tih a tarlang. Eptute chuan thilpek dawnga puh a nih chungchang hi chhuichiang turin an phut a, thubuai erawh siamsak a ni lo.

Thla hmasa khan Gemany aṭanga tuihnuai lawng lei chungchang chu chhui ṭan a ni. Netanyahu-a ukil chuan tuihnuai lawng lei dawna inbiakna neih lai hian company ai a awh nia a sawi vangin chhui zui a ni. Hei bakah hian France mi Arnaud Mimran chuan kum 2009 khan Netanyahu-a campaign-na tan euro tam tham tak a thawh niin a sawi bawk a, mahse hei hi PM chuan a pha thung.

Netanyahu hi UK-a vawi khat a zin ṭumin private bedroom a siamtirna atan sorkar sum dollar 127,000 khawhralah puh a ni bawk.