NKorea-in US kap pha missile a siam lo ang : Trump
US President-elect Donald Trump chuan North Korea ram chuan US kap thleng pha tur eng nuclear missile mah a siam dawn lo tih a sawi.
Thawhṭanni khan hemi chungchang hi Trump chuan a twitter-ah a ziak lang a, NKorea-in US kap pha tur missile a siam mek nia a insawi chu a pawm loh thu leh, a taka a thlen loh tur thu a sawi. China-in a ṭhian ṭha tak ram ni ṭhin, NKorea ram a puih duh loh chungchang pawh sawichhuakin, “China chuan sumdawnna hmangin US sum leh hausakna tam tak a hailut a, mahse North Korea erawh a pui duh chuang lo. Thil ṭha tak a ni!”, a ti.
Pathianni khan NKorea hotu, Kim Jong-un chuan an ram chuan nuclear ralthuam phur thei long-range missile an siam chu an enchhin thei hnai tawh niin a sawi. Kim chuan an ram chu khawchhak lama sipai thuam neiṭha, hmelma chak ber pawhin an khawih theih tawh loh tur an nih thu a sawi a ni.
North Korea hian nikum chhung khan nuclear test ṭum hnih a nei a, hei vang hian a ṭhenawm ramah hlauhthawnna a siam nasa hle. Mahse nuclear ralthuam phur thei long-range missile a enchhinte hi a la hlawhtling lo. Mithiamte chuan hetiang ralthuam siam tur chuan a rei lo berah kum nga tal a ngai dawn niin an chhut.