Kum 19 chhung Chicago-ah tualthahna thleng nasa ber
US-a Chicago chu khawvelah kum 19 chhung tualthahna thlen tam berna a ni.
Nikum chhung khan Chicago-ah hian tualthahna ṭum 762 thlengin, silaia inkahna ṭum 3,500 chuang a thleng bawk. Police statistics-a lan danin, kum 2016-ah khan kum 2015 aiin tualthahna 300 chuang leh inkahna vawi 1,000 chuangin a thleng tam zawk a ni. Nikum chhung khan dan loa silai kawl 8,300 man an ni bawk a, kum hmasa aiin 20% zetin an man tam zawk.
Bangladesh khawpuiah kangmei chhuak
Bangladesh khawpui, Dhaka-a bazar hmunah nimin zing khan kangmei a chhuak a, dawr tam tak a kang ral.
Kangmei chhuahna hi Gulashan DCCI market a ni a, he building-a dawr za chuang zet a kang a, building hmunṭhenkhat pawh a chim a ni. Kangmei chhuak hi kangṭhelhtu pawl 21 zetin an ṭhelh a, thi leh hliam erawh an awm hriat a ni lo. Kangmei chhuah chhan hi hriatchian la ni lo.
Myanmar sorkarin police officer man
Myanmar sorkar chuan security operation neih laia Rohingya muslim-te kutthlaktu, police officer eng emaw zat a man.
Sorkar chuan police officer-ten Rohingya mite kut an thlak lai video hmuh a nih hnuah heng officer-te hi man an nih thu a sawi. He video hi nikum November thla khan Rakhine state-a awm, police officer pakhatin a lak a ni. He video-a officer pakhat lang, Zaw Myao Htike chu midangte kut thlaktu zingah tel lo mah se, a meizial zu lai a lan avangin man tel a ni bawk.